کراچی (الیون نیوز) وزیراعلیٰ سندھ مراد علی شاہ نے کراچی اور حیدرآباد کو پانی کی فراہمی بہتر بنانے کے لیے اقدامات کا جائزہ لیا ہے۔ پیر کو وزیراعلیٰ ہاؤس میں اجلاس کی صدارت کرتے ہوئے انہوں نے کہا کہ شہر کی بڑھتی ہوئی ضروریات پوری کرنے کے لیے دستیاب وسائل کا بہتر استعمال ناگزیر ہے۔ اجلاس میں کے بی فیڈر نہر کی کنکریٹ لائننگ، کینجھر جھیل میں پانی کی ذخیرہ اندوزی اور کوٹری بیراج کی فزیبلٹی پر غور کیا گیا۔ وزیراعلیٰ نے نہروں اور بیراجوں کی آئندہ بندش کے دوران کراچی اور حیدرآباد کو بلا تعطل پانی فراہم کرنے کی ہدایت کی۔ کے بی فیڈر کی لائننگ سے پانی کی بچت اور کے فور منصوبے سے فراہمی میں بہتری متوقع ہے۔
ماخذ: ڈان، 10 نومبر 2026
0
