اسلام آباد (الیون نیوز)۔ اسلام آباد ہائی کورٹ نے وفاقی دارالحکومت میں بلدیاتی انتخابات کا شیڈول معطل کر دیا ہے۔ جسٹس عمیر مجید ملک نے چوہدری امجد علی کی درخواست پر الیکشن کمیشن کے 21 اکتوبر کے نوٹیفکیشن اور انتخابی شیڈول پر حکم امتناع جاری کرتے ہوئے اس کا نفاذ 26 نومبر کی اگلی سماعت تک روک دیا ہے۔ درخواست گزار کا موقف تھا کہ حلقہ بندیوں کی قانونی حیثیت طے کیے بغیر 20 دسمبر کو انتخابات نہیں ہو سکتے۔ دوسری جانب الیکشن کمیشن نے 160 رجسٹرڈ سیاسی جماعتوں کی تازہ فہرست جاری کر دی ہے جس میں ایم کیو ایم پاکستان کے سربراہ خالد مقبول صدیقی اور پختونخوا ملی عوامی پارٹی کے سربراہ محمود خان اچکزئی کے نام شامل نہیں جبکہ تحریک انصاف بھی بغیر سربراہ کے نام کے درج ہے۔ چیف الیکشن کمشنر سکندر سلطان راجہ نے جمعرات کو این اے 77 کیس کی سماعت کے دوران کہا تھا کہ وفاقی حکومت اسلام آباد کے بلدیاتی انتخابات سبوتاژ کرنے کی کوشش کر رہی ہے تاہم انتخابات طے شدہ شیڈول پر ہی ہوں گے۔ کیس کی سماعت یکم دسمبر تک ملتوی کر دی گئی ہے۔
ماخذ: ڈان، جیو
