قومی سلامتی کمیٹی کا ہنگامی اجلاس: بھارت کی جارحیت کا مؤثر جواب دینے اور پاک فوج کو مکمل اختیارات دینے کا فیصلہ
اسلام آباد (طلحہ راجہ)اسلام آباد، 7 مئی 2025 — وزیر اعظم شہباز شریف کی زیر صدارت قومی سلامتی کمیٹی کا اہم اور ہنگامی اجلاس منعقد ہوا جس میں ملک کی عسکری و سیاسی قیادت نے شرکت کی۔ اجلاس میں بھارت کی جانب سے پاکستانی حدود کی خلاف ورزی اور میزائل حملوں کے بعد کی صورتحال پر تفصیلی غور کیا گیا۔
اعلامیے کے مطابق، قومی سلامتی کمیٹی نے بھارت کی کارروائی کو پاکستان کی خودمختاری پر حملہ قرار دیا اور اسے “کھلی جارحیت” سے تعبیر کیا۔ اجلاس میں فیصلہ کیا گیا کہ پاکستان کی مسلح افواج کو دشمن کی جارحیت کا فوری، مؤثر اور مکمل جواب دینے کے لیے مکمل اختیارات تفویض کر دیے گئے ہیں۔
اجلاس میں یہ بھی بتایا گیا کہ پاکستان نے دفاع میں پانچ بھارتی جنگی طیارے مار گرائے اور ایل او سی پر بھرپور جوابی کارروائی کی گئی۔ اجلاس کے شرکاء نے افواج پاکستان کی پیشہ ورانہ صلاحیتوں پر مکمل اعتماد کا اظہار کیا اور ان کی قربانیوں کو سراہا۔
کمیٹی نے یہ بھی طے کیا کہ پاکستان اقوام متحدہ، او آئی سی اور دیگر عالمی فورمز پر بھارت کی حالیہ جارحیت کو بے نقاب کرے گا۔ ساتھ ہی، ملک میں سول ڈیفنس اقدامات کو فعال بنانے اور شہریوں کے تحفظ کے لیے ہنگامی اقدامات اٹھانے کی ہدایت دی گئی۔
وزیر اعظم نے اجلاس کے اختتام پر کہا:
“پاکستان امن چاہتا ہے، لیکن اگر دشمن نے جنگ مسلط کی تو پوری قوم اور افواج پاکستان مل کر بھرپور جواب دیں گے۔ ہر قیمت پر اپنی خودمختاری اور قومی سلامتی کا دفاع کریں گے۔”
