فرانس میں تاریخ رقم: پاکستانی نژاد عمر یعقوب Creil کے میئر منتخب
فرانس+ پیرس (الیون نیوز)فرانس کے شہر Creil میں پاکستانی نژاد سیاستدان عمر یعقوب نے تاریخی کامیابی حاصل کرتے ہوئے بلدیاتی انتخابات جیت لیے ہیں اور وہ جلد ہی شہر کے میئر کا عہدہ سنبھالیں گے۔
تفصیلات کے مطابق Creil میں ہونے والے انتہائی سخت مقابلے کے بعد عمر یعقوب کی قیادت میں انتخابی فہرست نے معمولی برتری سے کامیابی حاصل کی۔ غیر سرکاری نتائج کے بعد باضابطہ اعلان میں بھی ان کی کامیابی کی تصدیق کر دی گئی، جس کے بعد شہر میں جشن کا سماں دیکھنے میں آیا۔
عینی شاہدین کے مطابق ٹاؤن ہال کے باہر شہریوں کی بڑی تعداد جمع ہوئی، جہاں لوگوں نے نعرے لگائے اور خوشی کا اظہار کیا۔ اس موقع پر شہریوں نے اس کامیابی کو “تاریخی لمحہ” قرار دیا۔
اپنے پہلے خطاب میں عمر یعقوب کا کہنا تھا کہ:
“ہم اپنے شہر اور نوجوانوں کی امیدوں کا بوجھ اٹھائے ہوئے ہیں۔ ہم Creil کے تمام شہریوں کی خدمت کریں گے اور شہر کی مثبت پہچان قائم کریں گے۔”
سیاسی تجزیہ کاروں کے مطابق یہ کامیابی نہ صرف مقامی سیاست بلکہ یورپ میں مقیم پاکستانی کمیونٹی کے لیے بھی ایک اہم سنگ میل ہے۔ اگرچہ فرانس میں میئر کا باضابطہ انتخاب کونسل کے ذریعے مکمل ہوتا ہے، تاہم انتخابی نتائج کے بعد عمر یعقوب کا میئر بننا تقریباً یقینی قرار دیا جا رہا ہے۔
یہ بھی بتایا جا رہا ہے کہ Creil فرانس کا تیسرا بڑا شہر ہے جہاں بائیں بازو کی جماعت La France Insoumise نے کامیابی حاصل کی ہے۔
عمر یعقوب نے سخت مقابلے کے بعد اکثریت حاصل کی
ووٹر ٹرن آؤٹ میں نمایاں اضافہ دیکھنے میں آیا
شہریوں نے اس کامیابی کو “تاریخی” قرار دیا
جلد بطور میئر حلف اٹھانے کا امکان
